ಮಂಗಳೂರು: ಪ್ರಸ್ತುತ ಶಿಕ್ಷಣ ವ್ಯವಸ್ಥೆಯಲ್ಲಿ ಉದಯೋನ್ಮುಖ ತಂತ್ರಜ್ಞಾನಗಳನ್ನು ಜವಾಬ್ದಾರಿಯುತವಾಗಿ ಬಳಸಲು ಪ್ರೋತ್ಸಾಹಿಸುವ ನಿಟ್ಟಿನಲ್ಲಿ, ಕಾರ್ಮೆಲ್ ಕಿರಣ್ ಮೀಡಿಯಾ ವತಿಯಿಂದ ಶಿಕ್ಷಕರಿಗಾಗಿ ಎರಡು ದಿನಗಳ ಕೃತಕ ಬುದ್ಧಿಮತ್ತೆ (AI) ತರಬೇತಿ ಕಾರ್ಯಾಗಾರವನ್ನು ಬಿಕರ್ಣಕಟ್ಟೆಯ ಶಿಶು ಯೇಸು ದೇವಾಲಯದಲ್ಲಿ ಆಯೋಜಿಸಲಾಗಿತ್ತು.
ಶಿಕ್ಷಣ ಸಂಪನ್ಮೂಲಗಳ ಸಿದ್ಧತೆ, ವಿಡಿಯೊ ನಿರ್ಮಾಣ, ಸಂಶೋಧನೆ, ಸಾಮಾಜಿಕ ಜಾಲತಾಣಗಳ ಸಂವಹನ ಹಾಗೂ ನೇರ ಪ್ರಸಾರದಂತಹ ಕ್ಷೇತ್ರಗಳಲ್ಲಿ ಎಐ ತಂತ್ರಜ್ಞಾನವನ್ನು ಬಳಸುವ ವಿಧಾನಗಳನ್ನು ಕಾರ್ಯಾಗಾರದಲ್ಲಿ ಪರಿಚಯಿಸಲಾಯಿತು.
ಗೂಗಲ್ ಒರಾಕಲ್ ಎಐ ತರಬೇತುದಾರ ಲಿಯೋ ವಿಕ್ಟರ್ ಅವರು ಚಾಟ್‌ಜಿಪಿಟಿ, ಗೂಗಲ್ ಜೆಮಿನಿ ಮತ್ತು ಕ್ವೆನ್ ಬಳಸಿ ಸೂಚನೆಗಳ ಮೂಲಕ ಅಗತ್ಯ ಫಲಿತಾಂಶ ಪಡೆಯುವ ವಿಧಾನವನ್ನು ವಿವರಿಸಿದರು. ಸಂಶೋಧನೆಗೆ ನೋಟ್‌ಬುಕ್‌ಎಲ್‌ಎಂ, ಶೈಕ್ಷಣಿಕ ಚಟುವಟಿಕೆಗಳಿಗೆ ಮ್ಯಾಜಿಕ್‌ಸ್ಕೂಲ್ ಹಾಗೂ ಎಐ ಆಧಾರಿತ ವಿಡಿಯೊ ನಿರ್ಮಾಣಕ್ಕೆ ಗೂಗಲ್ ಫ್ಲೋ ಬಳಕೆಯ ಬಗ್ಗೆಯೂ ಮಾಹಿತಿ ನೀಡಿದರು.
ಪತ್ರಕರ್ತ ಫಾ. ಜೋಸಿ ಸಿದ್ದಕಟ್ಟೆ ಅವರು ಸಾಮಾಜಿಕ ಜಾಲತಾಣಗಳಿಗಾಗಿ ವಿಷಯ ರಚನೆ ಮತ್ತು ವೈಯಕ್ತಿಕ ಬ್ರ್ಯಾಂಡಿಂಗ್ ಕುರಿತು ಮಾರ್ಗದರ್ಶನ ನೀಡಿದರು. ಫಾ. ಕಿರಣ್ ಲೋಬೊ ಅವರು ಮೊಬೈಲ್ ಛಾಯಾಗ್ರಹಣ ಮತ್ತು ವಿಡಿಯೊ ಚಿತ್ರೀಕರಣದ ಬಗ್ಗೆ ತರಬೇತಿ ನೀಡಿದರೆ, ವಿಎಲ್ ಮೀಡಿಯಾದ ವಿಜಯ್ ಡಿಸೋಜ ಅವರು ಯೂಟ್ಯೂಬ್ ನೇರ ಪ್ರಸಾರದ ಕುರಿತು ಮಾಹಿತಿ ನೀಡಿದರು.
ಪಾಠ ಯೋಜನೆ ಸಿದ್ಧಪಡಿಸುವುದು, ತರಗತಿಗಳಲ್ಲಿ ವಿದ್ಯಾರ್ಥಿಗಳ ಆಸಕ್ತಿ ಹೆಚ್ಚಿಸುವುದು, ದೃಶ್ಯಮಾಧ್ಯಮದ ಮೂಲಕ ವಿಷಯಗಳನ್ನು ಪರಿಣಾಮಕಾರಿಯಾಗಿ ಪ್ರಸ್ತುತಪಡಿಸುವುದು ಸೇರಿದಂತೆ ವಿವಿಧ ಕಾರ್ಯಗಳಿಗೆ ಎಐ ಪರಿಕರಗಳನ್ನು ಬಳಸುವ ಬಗ್ಗೆ ಭಾಗವಹಿಸಿದವರು ತಿಳಿದುಕೊಂಡರು. ಶಿಕ್ಷಕರು ತಮ್ಮ ಬೋಧನಾ ಚಟುವಟಿಕೆಗಳಲ್ಲಿ ಈ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುವ ಆಸಕ್ತಿ ವ್ಯಕ್ತಪಡಿಸಿದರು.
ಕಾರ್ಯಾಗಾರದಲ್ಲಿ ಭಾಗವಹಿಸಿದವರಿಗೆ ತಲಾ ₹15,000 ಮೌಲ್ಯದ ಕ್ಯಾನ್ವಾ ಫಾರ್ ಎಜುಕೇಶನ್ ಸಂಪನ್ಮೂಲಗಳು ಮತ್ತು ಇನ್‌ವಿಡಿಯೊ ಸ್ಟುಡಿಯೊ ಸೌಲಭ್ಯಗಳನ್ನು ಒದಗಿಸಲಾಯಿತು ಎಂದು ಸಂಘಟಕರು ತಿಳಿಸಿದ್ದಾರೆ. ಮೂವರು ಭಾಗವಹಿಸಿದವರಿಗೆ ತಲಾ ₹25,000 ಮೌಲ್ಯದ ಪ್ರೀಮಿಯಂ ಸಿನೆಮ್ಯಾಟಿಕ್ ಸ್ಟುಡಿಯೊ ಆ್ಯಪ್ ನೀಡಲಾಗಿದ್ದು, ಇತರ ಮೂವರಿಗೆ ಶೋಕೇಸ್‌ಎಐ ಸಂಪನ್ಮೂಲಗಳನ್ನು ಒದಗಿಸಲಾಯಿತು.
ಶಿಕ್ಷಣ ಮತ್ತು ಮಾಧ್ಯಮ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುವವರಿಗೆ ಎಐ ತಂತ್ರಜ್ಞಾನದ ಪ್ರಾಯೋಗಿಕ ಜ್ಞಾನ ಒದಗಿಸುವುದು ಹಾಗೂ ಉದಯೋನ್ಮುಖ ತಂತ್ರಜ್ಞಾನಗಳನ್ನು ಜವಾಬ್ದಾರಿಯುತವಾಗಿ ಬಳಸಲು ಪ್ರೋತ್ಸಾಹಿಸುವುದು ಕಾರ್ಯಾಗಾರದ ಉದ್ದೇಶವಾಗಿತ್ತು.
