ಮಂಗಳೂರು: ಕರ್ನಾಟಕ ಜೆಸ್ಯೂಟ್ ಪ್ರಾಂತ್ಯದ ಮೂವರು ಜೆಸ್ಯೂಟ್ ಡೀಕನ್‌ಗಳು ಅಕ್ಟೋಬರ್ 02, ಮಂಗಳೂರಿನ ಫಾತಿಮಾ ರಿಟ್ರೀಟ್ ಹೌಸ್‌ನ ಡಿವೈನ್ ಮರ್ಸಿ ಚರ್ಚ್‌ನಲ್ಲಿ ನಡೆದ ಪವಿತ್ರ ವಿಧಿವಿಧಾನದಲ್ಲಿ ಗುರುಗಳಾಗಿ ಅಭಿಷೇಕಿಸಲ್ಪಟ್ಟರು. ಉಡುಪಿ ಧರ್ಮಪ್ರಾಂತ್ಯದ ಬಿಷಪ್ ಅತಿ ವಂದನೀಯ ಡಾ. ಲೆಸ್ಲಿ ಕ್ಲಿಫರ್ಡ್ ಡಿಸೋಜಾ ಅವರು ನೂತನ ಗುರುಗಳಿಗೆ ದೀಕ್ಷಾ ಸಂಸ್ಕಾರ ನೆರವೇರಿಸಿದರು.
ಫಾ. ಲ್ಯಾರನ್ ಜಾಯ್ ಮಿನೇಜಸ್ SJ, ಫಾ. ಪ್ರಜ್ವಲ್ ಮಾರ್ವಿನ್ ಅಪೋಸ್ SJ ಮತ್ತು ಬಾಂಬೆ ಪ್ರಾಂತ್ಯದ ಫಾ. ರೋಷನ್ ಕೆಲ್ವಿನ್ ಗೊವಿಯಾಸ್ SJ ಅವರು ಗುರುದೀಕ್ಷೆ ಪಡೆದ ನೂತನ ಪುರೋಹಿತರಾಗಿದ್ದಾರೆ.
ಈ ಬಾರಿಯ ದೀಕ್ಷಾ ಸಂಸ್ಕಾರದ ಆಚರಣೆಯನ್ನು “ಪ್ರೀತಿಸುವ ಹೃದಯಗಳು, ಸೇವೆ ಮಾಡುವ ಕೈಗಳು” ಎಂಬ ಧೀಮಂತ ಧ್ಯೇಯವಾಕ್ಯದೊಂದಿಗೆ ಆಯೋಜಿಸಲಾಗಿತ್ತು. ಇದು ನೂತನ ಗುರುಗಳ ಮುಂಬರುವ ಪ್ರೀತಿ ಮತ್ತು ಸೇವಾ ಮನೋಭಾವದ ಜೀವನವನ್ನು ಪ್ರತಿಬಿಂಬಿಸುವಂತಿತ್ತು. ಈ ಪವಿತ್ರ ಸಮಾರಂಭವು ನೂತನ ಗುರುಗಳ ಧಾರ್ಮಿಕ ಸೇವೆ ಹಾಗೂ ಕರೆಗಾಗಿ ಭಗವಂತನಿಗೆ ಮತ್ತು ಭಗವತ್ ಪ್ರಜೆಗೆ ಕೃತಜ್ಞತೆ ಸಲ್ಲಿಸುವ ಭಕ್ತಿಪೂರ್ವಕ ಕ್ಷಣಗಳಿಗೆ ಸಾಕ್ಷಿಯಾಯಿತು.
ಪವಿತ್ರ ಬಲಿಪೂಜೆಯ ನಂತರ ನೂತನ ಗುರುಗಳು ಹಾಗೂ ಅವರ ಹೆತ್ತವರನ್ನು ಆತ್ಮೀಯವಾಗಿ ಸನ್ಮಾನಿಸಲಾಯಿತು. ಕರ್ನಾಟಕ ಜೆಸ್ಯೂಟ್ ಪ್ರಾಂತ್ಯದ ಪ್ರೊವಿನ್ಶಿಯಲ್ ಫಾ. ಡಿಯೊನಿಸಿಯಸ್ ವಾಜ್ SJ ಅವರು ಮುಖ್ಯ ಆರಾಧಕರಾಗಿದ್ದ ಬಿಷಪ್ ಡಾ. ಲೆಸ್ಲಿ ಕ್ಲಿಫರ್ಡ್ ಡಿಸೋಜಾ, ಉಪಸ್ಥಿತರಿದ್ದ
ಇತರ ಗುರುಗಳು, ಧಾರ್ಮಿಕ ಬಂಧುಗಳು, ನೂತನ ಗುರುಗಳ ಕುಟುಂಬಸ್ಥರು ಹಾಗೂ ಹಿತೈಷಿಗಳಿಗೆ ಧನ್ಯವಾದ ಅರ್ಪಿಸಿದರು. ನೂತನ ಗುರುಗಳ ಪರವಾಗಿ ಮಾತನಾಡಿದ ಫಾ. ಮಾರ್ವಿನ್ ಅಪೋಸ್ SJ, ತಮ್ಮ ಜೀವನದ ವಿವಿಧ ಹಂತಗಳಲ್ಲಿ ಮಾರ್ಗದರ್ಶನ ನೀಡಿದ ಪ್ರತಿಯೊಬ್ಬರನ್ನೂ ನೆನೆದು ಕೃತಜ್ಞತೆ ಸಲ್ಲಿಸಿದರು.
ಫಾ. ರಾಯ್ಡನ್ ಮಿಸ್ಕ್ವಿತ್ SJ ಮತ್ತು ಸ್ಕಾಲರ್ ಮೆಲ್ವಿನ್ ಗೊವಿಯಸ್ SJ ಅವರು ಸುಂದರವಾದ ಧರ್ಮವಿಧಿಗಳನ್ನು (Liturgy) ಸಿದ್ಧಪಡಿಸುವ ಮೂಲಕ ಡೀಕನ್‌ಗಳನ್ನು ದೀಕ್ಷಾ ಸಂಸ್ಕಾರಕ್ಕೆ ಸಜ್ಜುಗೊಳಿಸಿದ್ದರು. ಇಡೀ ಪವಿತ್ರ ಬಲಿಪೂಜೆಯ ವಿಧಿವಿಧಾನಗಳನ್ನು ಫಾ. ಆಂಟನಿ ಪಾಯ್ಸ್ ಅವರು ಪ್ರಧಾನ ನಿರ್ವಾಹಕರಾಗಿ (Master of Ceremonies) ಯಶಸ್ವಿಯಾಗಿ ಮುನ್ನಡೆಸಿದರು. ಸಮಾರಂಭದಲ್ಲಿ ಅಪಾರ ಸಂಖ್ಯೆಯ ಸಾರ್ವಜನಿಕರು ಹಾಗೂ ಭಕ್ತಾದಿಗಳು ಪಾಲ್ಗೊಂಡಿದ್ದರು.
