ವಿಟ್ಲ:ಪೆರುವಾಯಿ, ಮೇ 24:ಇಲ್ಲಿನ ಫಾತಿಮಾ ಮಾತೆಯ ದೇವಾಲಯದ ವ್ಯಾಪ್ತಿಯ ಜೋನ್ ಮೊಂತೇರೊ ಹಾಗೂ ದುಲ್ಸಿನ್ ದಂಪತಿಯ ಪುತ್ರ ವಂದನೀಯ ಪ್ರವೀಣ್ ಮೊಂತೇರೊ ಅವರು ಯಾಜಕ ದೀಕ್ಷೆ ಪಡೆದು 10 ವರ್ಷಗಳು ಸಂದ ಹಿನ್ನೆಲೆಯಲ್ಲಿ, ಅವರ ಯಾಜಕ ದೀಕ್ಷೆಯ ದಶಮಾನೋತ್ಸವ ಸಂಭ್ರಮಾಚರಣೆಯು ಭಾನುವಾರ ಅತ್ಯಂತ ಶ್ರದ್ಧಾಭಕ್ತಿ ಹಾಗೂ ಸಡಗರದಿಂದ ಜರುಗಿತು.
ದೇವಾಲಯದಲ್ಲಿ ನಡೆದ ಪವಿತ್ರ ದಿವ್ಯ ಬಲಿಪೂಜೆಯಲ್ಲಿ ಪೆರುವಾಯಿ ಚರ್ಚ್ನ ಧರ್ಮಗುರುಗಳಾದ ವಂದನೀಯ ಸೈಮನ್ ಡಿಸೋಜಾ, ದಶಮಾನೋತ್ಸವ ಸಂಭ್ರಮದ ರೂವಾರಿ ವಂದನೀಯ ಪ್ರವೀಣ್ ಮೊಂತೇರೊ ಹಾಗೂ ವಂದನೀಯ ರೋಷನ್ ಮೊಂತೇರೊ ಅವರು ಸಹ-ಬಲಿಪೂಜೆ ನೆರವೇರಿಸಿ ಪ್ರಾರ್ಥಿಸಿದರು.
ಬಲಿಪೂಜೆಯ ಧಾರ್ಮಿಕ ವಿಧಿವಿಧಾನಗಳ ನಂತರ ದೇವಾಲಯದ ವತಿಯಿಂದ ವಂದನೀಯ ಪ್ರವೀಣ್ ಮೊಂತೇರೊ ಅವರಿಗೆ ಆತ್ಮೀಯ ಸನ್ಮಾನ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಚರ್ಚ್ನ ಪಾಲನಾ ಮಂಡಳಿಯ ಉಪಾಧ್ಯಕ್ಷರಾದ ಡೆನಿಸ್ ಮೊಂತೇರೊ ಮತ್ತು ಕಾರ್ಯದರ್ಶಿ ವಿನ್ಸೆಂಟ್ ಡಿಸೋಜಾ ಅವರು ಉಪಸ್ಥಿತರಿದ್ದು, ಗೌರವ ಸಲ್ಲಿಸಿದರು. ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ನೂರಾರು ಭಕ್ತಾದಿಗಳಿಗೆ ಈ ಸಂದರ್ಭದಲ್ಲಿ ಲಘು ಉಪಹಾರದ ವ್ಯವಸ್ಥೆಯನ್ನು ಮಾಡಲಾಗಿತ್ತು.
