ಮಂಗಳೂರು: ಕರಾವಳಿ ಕರ್ನಾಟಕದ ಆರ್ಥಿಕ ಜೀವನಾಡಿ ಎನಿಸಿರುವ ನವ ಮಂಗಳೂರು ಬಂದರಿನ (NMPA) ಮೂಲಸೌಕರ್ಯವನ್ನು ಮತ್ತಷ್ಟು ಬಲಪಡಿಸಲು ಕೇಂದ್ರ ಬಂದರು, ಹಡಗು ಮತ್ತು ಜಲಮಾರ್ಗಗಳ ಸಚಿವಾಲಯವು (MoPSW) ₹438.29 ಕೋಟಿ ವೆಚ್ಚದ ಬೃಹತ್ ಯೋಜನೆಗೆ ಅನುಮೋದನೆ ನೀಡಿದೆ. ಎಂದು ಕ್ಯಾಪ್ಟನ್ ಬ್ರಿಜೇಶ್ ಚೌಟ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ
ಲಿಕ್ವಿಡ್ ಕಾರ್ಗೋ ನಿರ್ವಹಣಾ ಸಾಮರ್ಥ್ಯ ಹೆಚ್ಚಳ:ಈ ಯೋಜನೆಯಡಿ ನವ ಮಂಗಳೂರು ಬಂದರಿನ ಬರ್ತ್ ಸಂಖ್ಯೆ 9ರ ಪುನರ್ ಅಭಿವೃದ್ಧಿ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳಲಾಗುವುದು. ಈ ಪ್ರಮುಖ ಅಭಿವೃದ್ಧಿಯಿಂದಾಗಿ ಬಂದರಿನ ಲಿಕ್ವಿಡ್ ಕಾರ್ಗೋ (ದ್ರವ ಸರಕು) ನಿರ್ವಹಣಾ ಸಾಮರ್ಥ್ಯವು ಗಣನೀಯವಾಗಿ ಹೆಚ್ಚಾಗಲಿದೆ. ಇದು ಅತೀ ದೊಡ್ಡ ಗಾತ್ರದ ಹಡಗುಗಳು ಸುಲಭವಾಗಿ ಬಂದರಿಗೆ ಆಗಮಿಸಲು ಮತ್ತು ಸರಕು ನಿರ್ವಹಿಸಲು ಅನುಕೂಲ ಮಾಡಿಕೊಡಲಿದೆ.
ನವ ಮಂಗಳೂರು ಬಂದರು ಈಗಾಗಲೇ ಕರಾವಳಿ ಕರ್ನಾಟಕ ಮತ್ತು ಕೇರಳದ ಒಳನಾಡು ಪ್ರದೇಶಗಳಿಗೆ ಪ್ರಮುಖ ಸಂಪರ್ಕ ಕೊಂಡಿಯಾಗಿದೆ. ಈ ಹೊಸ ಯೋಜನೆಯು ಜಾರಿಗೆ ಬರುವುದರಿಂದ, NMPA ಈ ಭಾಗದ ಪ್ರಮುಖ ‘ಮೆರಿಟೈಮ್ ಮತ್ತು ಎನರ್ಜಿ ಗೇಟ್ವೇ’ ಆಗಿ ತನ್ನ ಸ್ಥಾನವನ್ನು ಮತ್ತಷ್ಟು ಭದ್ರಪಡಿಸಿಕೊಳ್ಳಲಿದೆ.
ಆರ್ಥಿಕ ಪ್ರಗತಿಗೆ ಪೂರಕ: ಈ ಅಭಿವೃದ್ಧಿ ಕಾಮಗಾರಿಯು ಕೇವಲ ಬಂದರಿಗೆ ಸೀಮಿತವಾಗದೆ, ಕರಾವಳಿ ಭಾಗದ ಪ್ರಮುಖ ಕೈಗಾರಿಕೆಗಳು ಮತ್ತು ಲಾಜಿಸ್ಟಿಕ್ಸ್ ವ್ಯವಸ್ಥೆಗೆ ಹೊಸ ಚೈತನ್ಯ ನೀಡಲಿದೆ. ಇದರಿಂದ ಸ್ಥಳೀಯ ಉದ್ಯೋಗಾವಕಾಶಗಳು ವೃದ್ಧಿಸುವುದಲ್ಲದೆ, ಒಟ್ಟಾರೆ ಪ್ರಾದೇಶಿಕ ಆರ್ಥಿಕ ಬೆಳವಣಿಗೆಗೆ ಇದು ದೊಡ್ಡ ಮಟ್ಟದ ಬೆಂಬಲ ನೀಡಲಿದೆ ಎಂದು ನಿರೀಕ್ಷಿಸಲಾಗಿದೆ.
ಬಂದರಿನ ಆಧುನೀಕರಣ ಮತ್ತು ಸಾಮರ್ಥ್ಯ ವೃದ್ಧಿಯ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರದ ಈ ಕ್ರಮವು ಮೈಲಿಗಲ್ಲಾಗಲಿದೆ